粥底牛肉宴@北斗翁頂尊火鍋料理

小妹由細到依家都好喜歡食肉類既食物，無論點都好一日三餐都要有肉，所以家人都會叫小妹做「食肉獸」，而咁多肉類當中除左羊肉之外，另一類當然就係牛肉啦!

因為牛肉可以提供高質量的蛋白質，而且含有與人體比例一致同全部種類的氨基酸，當中所含的肌氨酸比任何食物都高。除此之外，牛肉的脂肪含量很低，仲含有礦物質和維他命B雜，可以為人體提供每天所需要的鐵質。

因為小妹太喜歡牛肉啦，所以又點可以錯過同一班朋友一試有肥牛專門店之稱既北斗翁頂尊火鍋料理的粥底牛肉盛宴呢!

Yeah Yeah Yeah !!!粥底牛肉盛宴我黎啦!!!

一入到去已經覺得環境好舒適寬敞，未食已經俾環境吸引住啦!!!

如果一家三/四口子就當然要坐佢地既Sofa卡座，自己自成一閣，有一種好似包左個小廳既感覺呀!!!

一坐埋枱小妹就已經見到好多林林種種既醬油同配料，例如XO醬、蔥、沙嗲醬等...

haha...又係小妹搞搞陣既時間啦!!!平日在家中混醬時就最愛加入生同熟蒜，因為小妹太心急啦，有時食物未熟已經放入口中，所以生蒜可以殺殺菌!!!

而北斗翁既食材咁新鮮，簡簡單單既混醬就已經好好味，唔洗多加花樣啦!!!

當然混醬係要視乎自己個人喜好...Haha!!!

除左有混醬材料，枱面仲已經有好多唔同既飲品呀!!!由左起有橙汁、酸梅湯、竹蔗水，食火鍋可能都會有少少燥熱就等小妹揀番樣下火飲品先。

係店內除左有以上面個幾款飲品之外，仲有多款不同既酒類可以選擇，啤酒、日本清酒...你睇下個酒櫃就知有幾多選擇啦!!!

小妹同一班朋友又點可以錯過店內推介既讚 大吟釀呢，大吟釀一般是以50%左右的精米釀製，釀成後會有自己特有的酒香同色澤。

小妹平日飲清酒時都會以熱水座暖清酒先飲用，但今次依款同小妹平日飲既好唔同，而係用冰水座至清酒凍身才飲用既!!!

一問之下，原來好品質既清酒應該係凍飲既，因為凍飲先可以真正品嚐出清酒既順喉、醇滑、香味、同辛或甘既味道。

的確今次飲既清酒沒有平常飲用時只覺得口內同喉嚨辛辣。這次試入口時，覺得比清酒比平常的香醇，在喉嚨時不會有想它快點滑下去既感覺。令次一試後，小妹開始慢慢改變了我對清酒既想法。

對小妹而言，食火鍋最好既飲品配搭當然就係啤酒啦!!!店內提供了兩款不同由啤酒機打出來既啤酒，分別為1664 Blanc及Hoegarden。小妹就選上平日最愛的1664 Blanc。

 

今次盛宴既主題係粥底牛肉，意思當然係以粥底作為湯底啦!!!今次有好開心可以食到瑤柱白粥鍋底呀!!!

你地睇個粥底滾起時未放材料已經好香米味，而入口亦好綿!!!

今次另一重點係牛肉，小妹又點可以錯過試店內不同既牛肉配料呢!首先為大家介紹既有頂級雪花肥牛。美味可口肥牛要好食除左要肥牛本身有網狀既雪花紋外，當然每片肥牛既厚度都會好影響口感啦!!!

你地睇依碟切到厚薄相稱既雪花肥牛，每片肥牛上既雪花都好平均分佈係牛肉上，未食已經知道淥完出黎一定會好可口。

果然入口已經食到濃濃既牛香，而且肉質相當滑嫩，好好味呀!!!

一碟頂級雪花肥牛又點可以滿足到小妹同一班朋友呢!登登登登...有隻至尊牛肉船即刻登陸我地張枱啦!!!

隻至尊牛肉船分為兩面，兩面都以冰鎮方式將牛柳片同牛柳粒送上。

WOW!!!一片片切得厚薄適中既牛柳片，上面滿佈雪花紋，而且脂肪比例適中，相信食完味蕾一定可以好滿足。

由於小妹食牛肉都喜歡比較嫩身，所以輕輕一淥就己經將牛肉放入口中啦!!!!

一入口牛香已經慢慢湧出來，而且牛肉口感很好，一點韌既感覺都沒有，令我好想一食再食呀!!!

係至尊牛肉船上除左牛柳片，又點可以唔試埋牛柳粒呢?!

一粒粒既牛柳粒同先前既牛柳片一樣都滿佈大理石般油花，而且師傅已經將牛柳切成一粒粒適合一口食用的大細，真係好細心呀!

由於牛柳粒比較厚身，小妹都係決定要淥耐少少先食。但就算淥既時間長左，但肉質都唔會好老身，而且牛肉味比雪花肥牛更濃郁。

話明係食牛專門店又點會得至尊牛肉船同頂級雪花肥牛兩款牛肉配料咁少呢?!

小妹仲試埋佢地自製牛丸添，每好似波子般既牛丸整整齊齊排係碟上等緊小妹同朋友們!!!

牛丸入口彈牙，而肉汁依然保留係入面，味道令人回味。

識食牛當然仲會食埋牛既其他部位啦!!!就等小妹由牛頭開始介紹啦!!!

頭入面當然包括牛既口啦，而小妹要介紹既係口入面既精選牛脷托...用黎做火鍋配料小妹都係第一次食呀!!!

平日BBQ食到既牛脷托都係好脆身，而今次用淥既方法令牛脷托好爽脆煙韌，下次食火鍋一定會再點呀!

牛胃又點少得呢，今次食到既係牛既第三個胃(瓣胃)亦者係牛柏葉，我地食既仲要係爽脆黑柏葉。一般牛柏葉都係白色，因為經漂白過。

依個黑柏葉好爽口，煙韌但又唔係咬唔開個個感覺，好好味呀!!!

除左牛脷托同黑柏葉仲有牛骨髓，奶白色既牛骨髓淥完好似熱熱既啫喱，好得意呀!!

除左牛之外，一入門口就見到有大大個魚缸，好多新鮮既海鮮係入面游來游去，小妹又點可以唔試下D新鮮海鮮呢?!

平日龍躉起肉炒成小菜就食得多，今次就要試下淥生劏龍躉片。

WOW!!!一片片厚厚而且雪白既龍躉片，好吸引呀!!!依個龍躉片肉質滑嫩而且啖啖肉無小骨，對於怕魚食到骨既朋友就最好不過!!!

大魚又點只龍躉，仲有鯇魚呀!!!脆肉鯇骨腩片最岩小妹啦!!!



雖然係魚腩位置會比較多骨，但師傅貼心地將魚腩切成一片片薄得可以透光般既腩片，所以就算唔係好識吐骨既朋友都唔怕俾骨卡於喉嚨，而脆肉鯇淥完唔會散曬，入口好滑呀!!!

食完大魚當然要食下D體型比例細小小既鱔啦!!!咸淡水鱔片呀!!!

放入粥底不消數分鐘就有肉質爽脆既水鱔片食啦!!!

手打魚滑就係小妹魚食之中其中大愛啦!!!因為小妹屋企都可以算上係水上人，家中食火鍋時都會自己親手打魚滑，試過自己打就知道要打出好味又滑既魚滑好考功夫 (小小TIPS:如果打既時間要去走油膩可以用茶代水打)。

今次食到既魚滑，完全唔腥之餘仲好彈牙，而且好足魚味，完全係百份百用魚打出黎，而唔係一般加左面粉打出黎個D!!!

食肉獸既小妹當然除左牛同魚之外仲要試下其他肉同內臟啦!!!

首先有頂級鴕鳥肉!!!鴕鳥肉又係含有豐富蛋白質，而且含有多元不飽和脂肪酸，就算食多左都唔怕!!!



鮮紅肉滴既鴕鳥肉，淥完肉質都唔會老身，味道相當不錯!

黃沙靚豬潤對於平日小食豬潤既小妹都忍不住口呀!!!



依碟豬潤唔似一般食到咁好粉，而係爽口，仲要去走根，令豬潤唔食有渣!!



仲有碟新鮮鵝腸等緊小妹添!!!輕輕淥一淥就可以食到爽脆既鵝腸，真係性急小妹既大愛!!!

食左咁多肉同內臟又點可以試下其他野呢?! 北斗翁既鎮店水餃皇都好美味!!!

一隻隻大過湯匙既水餃，入面包住數隻蝦、木耳絲、蝦肉等材料。一口入面總會食到彈牙既鮮蝦同爽口既木耳絲!!!YUMMY!!!

店內脆口炸腐皮都好好食，因為都係新鮮即炸成金黃色，所以上枱時有散散香味，絕對唔係出面食到好有油"益"味既響鈴...

而個脆口炸腐皮有兩個食法，可以用提供既酸甜汁醮來食，另一個方法就係醮粥底...由於小妹鍾意食脆卜卜既食物，所以都係醮酸甜汁!!!

一枱到都係食物，真係好開心呀!!!

當差不多飽飽之際又點可以唔食埋個日式野菜籃平衡下呀!!!一個菜籃有多種不同既蔬菜，例如:生菜、西洋菜、金菇菜...

食飽之後仲有水果同甜點作總結，真係好完美既粥底牛肉盛宴呀!!!

餐廳資料:

名稱：北斗翁頂尊火鍋料理 Beidouweng Hotpot Cuisine

地址：銅鑼灣波斯富街99號利舞臺19樓

電話：2191 7328

是次試食為個人觀感及分享，菜式口味優劣屬於小妹個人感覺，不同人士口味各異。

BlogspotTheZtyle

Glamablog

Elle

Pixnet